“Vergi və hesabatlılıq” işçi qrupunun növbəti iclası keçirilib

 

Biznes mühiti və beynəlxalq reytinqlər üzrə Komissiyanın İqtisadiyyat Nazirliyi yanında Dövlət Vergi Xidmətinin rəhbərlik etdiyi “Vergi və hesabatlılıq” işçi qrupunun növbəti iclası keçirilib. Tədbirdə Dövlət Vergi Xidməti, Maliyyə Nazirliyi, Mərkəzi Bank, Dövlət Gömrük Komitəsi, Dövlət Statistika Komitəsi, Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi, Auditorlar Palatası, eləcə də işçi qrupa daxil olan konsaltinq şirkətlərinin nümayəndələri və sahibkarlar iştirak ediblər.

İşçi qrupun rəhbəri, Dövlət Vergi Xidmətinin rəis müavini İlkin Vəliyev Dünya Bankı tərəfindən təqdim olunan “Business Ready” hesabatının müvafiq “Vergitutma” indikatoru  üzrə həyata keçirilən işlər, həmçinin iclasın gündəliyində olan digər məsələlər barədə məlumat verib.

Komissiyanın Katibliyinin rəhbəri, Azərbaycan Respublikası Prezidentinin Administrasiyasının İqtisadi siyasət və sənaye məsələləri şöbəsinin sektor müdiri Vüsal Şıxəliyev Yol Xəritəsi üzrə vergitutma sahəsində həyata keçirilən işlərin əhəmiyyətini vurğulayıb, biznes sektorunun aparılan islahatlar, yeniliklər, həmçinin vergi qanunvericiliyində və inzibatçılığında mövcud imkanlar barədə daha intensiv məlumatlandırılmasının zəruriliyini vurğulayıb.

İclasda “Vergitutma” indikatoru ilə bağlı müvafiq sahədə təkmilləşmələrin və kommunikasiyanın həyata keçirilməsinə dair 2024-cü il üzrə Yol Xəritəsinin 1-ci yarımili üzrə görülmüş işlər, habelə ondan sonrakı dövrdə görülən işlər barədə təqdimat edilib. Qeyd edilib ki, vergi qanunvericiliyinə  hazırlanan yeni dəyişikliklərlə bağlı dövlət və özəl sektorla, həmçinin bu sahədə çalışan konsaltinq şirkətləri ilə görüşlər keçirilir.

İclasda həmçinin ƏDV depozit hesabından dövlət büdcəsinə köçürmələrin reqlamenti müzakirə edilib. Konsaltinq şirkətlərinin məsələ ilə bağlı yanaşmaları, habelə üzləşdikləri əsas məqamlara ətraflı izahat verilib. 

İşçi Qrupun rəhbərinin müavini, Dövlət Vergi Xidmətinin Vergi siyasəti Baş İdarəsinin rəisi Nicat İmanov Vergi Məcəlləsinə gözlənilən dəyişikliklərin əsas istiqamətləri barədə iclas iştirakçılarını məlumatlandırıb, habelə “Naxçıvan Muxtar Respublikasının sosial-iqtisadi inkişafına dair 2023–2027-ci illər üçün Dövlət Proqramı”ndan irəli gələn və bu bölgədə tətbiqi nəzərdə tutulan vergi təşviqləri barədə məlumat verib.

İclasda işçi qrupun üzvləri və konsaltinq şirkətlərinin nümayəndələri onları maraqlandıran məsələlərlə bağlı suallar ünvanlayıblar. Qaldırılan məsələlər barədə izahat verilib, bir sıra təkliflər baxılmaq üçün qeydə alınıb.

Bununla yanaşı, iclasda 2024-cü il üzrə Yol Xəritəsinin hədəflərinə dair müzakirə növbəti dövrdə həyata keçirilməsi nəzərdə tutulan işlər müzakirə olunub. İşçi qrup ilin sonunadək Yol Xəritəsi üzrə qarşıda duran hədəfləri müəyyən edib, tədbirlərin icrası istiqamətində işlərin sürətləndirilməsi ilə bağlı Dövlət Vergi Xidmətinin müvafiq strukturlarına tapşırıqlar verilib.

Məlumat üçün bildiririk ki, Biznes mühiti və beynəlxalq reytinqlər üzrə Komissiyanın “Vergi və hesabatlılıq” işçi qrupuna rəhbərliyi Dövlət Vergi Xidməti həyata keçirir.

 

×